Дмитри Медоеви Даур Ақаҩбеи реиԥылара мҩаԥысит

Дмитри Медоеви Даур Ақаҩбеи реиԥылара мҩаԥысит
3 October 2018 56
Ахаша, жьҭаара 3 рзы Аԥсны адәныҟатәи аусқәа рминистр Даур Ақаҩбеи Аахыҵ Уаԥстәыла адәныҟатәи аусқәа рминистр Дмитри Медоевы еиԥылеит. Аиԥылара ихы алаирхәит Аԥсны аиашахаҵаратә уахәама ахада аб Виссарион Аԥлиа.

Аахыҵ Уаԥстәыла адәныҟатәи аусқәа рминистр Дмитри Медоев иазгәеиҭеит  Аахыҵ Уаԥстәыла аделегациа гәахәарыла ахы шаланархәыз Аиааиреи Ахьыԥшымреи 25-шықәса рхыҵра амшныҳәа амҩаԥгара.

"Аҭагылазаашьа схы иархәаны исҭахуп адәныҟатәи аусқәа рминистрра аколлектив абри амшныҳәа рыдысныҳәаларц» - иҳәеит Медоев.

Аԥсни Аахыҵ Уаԥстәылеи ирхықәкы хаданы иҟоу акоуп –  адунеи ҳалахәра арҭбаара, адунеи атәылақәа еиҳа ҳардыруа аҟаҵара иҳәеит иара.

Дмитри Медоев Аԥсни Аахыҵ Уаԥстәылеи рҩызцәа рыԥшаара иацҵатәуп ҳәа азгәеиҭеит.
Аахыҵ Уаԥстәыла азхаҵара 10-шықәса ахыҵра иазкны иаԥҵоуп жәларбжьаратә аусеицураҿ алагаламҭазы аусбарҭатә ҳамҭа.

"Нанҳәа 26 рзы  Аахыҵ Уаԥстәыла азхаҵара 10-шықәса ахыҵра иазкны имҩаԥысуаз ауснагӡатәқәа раан, аиубилеи иазкны иаԥҵоу жәларбжьаратә аусеицураҿ алагаламҭазы аусбарҭатә ҳамҭа – амедал,  ранашьан Урыстәыла адәныҟатәи аусқәа рминистр Сергеи Лавров, ихаҭыԥуаҩ Григори Карасин» - иҳәеит Медоев.
Абри амедал ранашьахеит иара убасгьы Аԥсны адәныҟатәи аусқәа рминистр Даур Ақаҩбеи аб Виссарион Аԥлиеи.
Аԥсны адәныҟатәи аусқәа рминистр Даур Ақаҩба Аахыҵ Уаԥстәыла аделегациа  Аԥсны рыҟазаара агәахәара ду шинаҭо иҳәеит.

"Ҭабуп ҳәа шәасҳәоит ҳныҳәамш шәхы ахьалашәырхәыз. Ҳара ҳзы аҵак ду амоуп ҳаиашьаратә уаԥс жәлар иахьагьы иахьҳавагылоу. Еиҳа иуадаҩыз аамҭақәа рызгьы шәара раԥхьатәиқәа шәреиуан» - иҳәеит Ақаҩба.
Даур Ақаҩба иазгәеиҭеит ареспубликақәа рыҩба реизыҟазаашьақәа аҿиара бзиа рыманы ишыҟоу.
Аԥсни Аахыҵ Уаԥстәыла рыдәныҟаполитикатә усбарҭа анапхгаҩцәа иара убасгьы иалацәажәеит лассы иҟалараны иҟоу  Кавказ аҭынчреи аҭышәынтәалареи рзы имҩаԥысуа женеватәи аиҿцәажәарақәа.



Иҵоуроу азхьарԥшқәа

 
 
 
X

Форма обратной связи

ФИО:
E-MAIL:
Телефон:
Ваше сообщение: